دا به له تیرو ۱۲ میاشتو راهیسې، څلورم صدر اعظم وي چې ماکرون یې د باور رایې لپاره پارلمان ته ورپیژني.
فرانسوا بایرو پرون د پارلمان ۳۴۶ غړو د عدم اعتماد رایې ورکړې، حال دا چې د ده په ګټه کارول شوې رایې ۱۹۴ وې.
څلور اویا کلن بایرو د ۲۰۲۴ کال په دسمبر کې د فرانسې د صدر اعظم په توګه ټاکل شوی و.
په همدې حال کې د فرانسې د ولسمشرۍ ماڼۍ اعلان کړی چې مکرون به په راتلونکو ورځو کې نوی صدر اعظم معرفي کړي.
د راتلونکي دولت اصلي دنده به د بودجې تصویب وي. هغه کار چې له واکه لرې شوی صدر اعظم د کار په لومړیو کې ورسره مخامخ و.
په فرانسه کې د دولت ادلون بدلون داسې مهال ترسره کیږي چې دغه هېواد دا مهال له یوشمېر ننګونو، له هغې ډلې د بودجې له ستونزو او په نړیواله کچه د اوکراین او غزې د جګړو له اغیزو سره مخامخ دی.
بل لورته د امریکا ولسمشر ډونالډ ټرمپ د اوکراین او غزې د جګړو د پای ته رسولو په چارو کې د خپلو اروپایي متحدانو په ځانګړې توګه فرانسې او جرمني مرسته غواړي.
ټرمپ له دغو اروپایي مشرانو په زغرده غوښتي چې پر روسیې بندیزونه ولګوي او د تیلو او ګازو پېرل یې تحریم کړي.
د فرانسې صدر اعظم هغه ته د عدم اعتماد له رایو مخکې پارلمان ته وویل " تاسو د دولت د پرزولو واک لری، خو د واقعیتونو د پاکولو قدرت نه لری، واقعیت به همداسې سخت پاته کیږي. لګښتونه به همداسې لوړېږي. پر دولت به د پورونو بار درنیږي او بیه به یې نوره هم لوړېږي."
د فرانسې د دولت ټول پور د سږکال د لومړنیو درې میاشتو په پای کې درې تریلیونه او ۳۴۶ میلیارده یورو و.
د پور ورکړه د فرانسې د دولت د لګښتونو شاوخوا ۷ فیصده برخه جوړوي.
په همدې حال کې د اوسني ولسمشر امانویل مکرون مخالفان له اوسني ناورینه ګټه اخلي او هڅه کوي چې د پارلمان نوې ټاکنې ترسره او د مکرون ګوښه کېدو یا دولت کې د څوکیو ترلاسه کولو ته لاره هواره کړي.
د ښي اړخي افراطي ګوند مشرې مارین لوپن له مکرون نه وغوښتل چې پارلمان منحل کړي.
هغه په ظاهره ډاډه ښکاري چې د ملي تجمع ګوند او متحدان به یې راتلونکي پړاو ټاکنو کې اکثریت ترلاسه او نوی دولت به جوړ کړي.