پکتیا په ځاځي اریوب کې د لیدو څه دي؟
د افغانستان له بیلابیلو سیمو او ولایتونو د پکتیا د ځاځي اریوب ولسوالۍ سړې، شنې او ځنګلیزې سیمې ته یوازې د اختر په درو ورځو کې په زرګونه سیلانیان ورغلي دي. د ځاځي اریوب اوسیدونکي خوښ دي چې د سیلانیانو په ډېریدو سره دوی ته د کاروبار زمینه برابره شوې ده. خو سیلانیان وايي، په دې ځای کې لا هم پوره اسانتیاوې نه دي برابرې شوي او د ټکټونو په ګډون د نورو خدمتونو بیې په کې لوړې دي.