د خوست ولایت د سپېرۍ ولسوالۍ په وژل شويو درې ماشومانو کې چې تر لسو کلونو یې عمرونه کم ښودل شوي، یوه نجلۍ او د همدرد او همایون په نومونو دوه هلکان شامل دي.
د دغې ولسوالۍ یو اوسېدونکي او د وژل شویو ماشومانو یو ګاونډي چې نه یې غوښتل د موضوع د حساسیت له امله یې په راپور کې نوم خپور شي، د جنازې له ځایه یې ازادي راډیو ته یې وویل "تېره شپه چې د خوست په سپېره ولسوالۍ لاهوري سیمه کې د پاکستان لخوا پر یوې کورنۍ ډرون برید وشو او توغندی یې پرې وتوغاوه، دې حمله کې درې ماشومان شهیدان دي چې درې واړه د یوې کورنۍ دي، څلور کسان ټپیان دي، ټپیان ښار ته روغتون ته استول شوي، ډاکتران وایي چې د هغوی وضعیت د ډاډ وړ دی، بیګاه شپه زموږ کلی کې ډېره لویه غمیزه وه، ټوله شپه ډرون الوتکې ګزمې کولې، ټول ماشومان او (ښځې) له کورونو بهر وې دېرې په تکلیف وې."
دې حمله کې درې ماشومان شهیدان دي چې درې واړه د یوې کورنۍ دي، څلور کسان ټپیان ديد سپیرې ولسوالۍ د پیښې یو عیني شاهد
د دې ولسوالۍ یو بل اوسېدونکې او د یادې پېښې شاهد چې ده هم نه غوښتل د ورته ستونزې له امله یې په راپور کې نوم خپور شي ازادي راډیو ته یې وویل"بیګاه د شپې لس بجې وې چې بې پیلوټه الوتکې د سور کښ او لاهوري سیمه کې د نعیم ګل حاجي په کور برید وکړ، دا لوتکه د افغان دوبۍ (سرحدي سیمې) لخوا راوښتې وه، خلکو ویل چې اوس به بیا حمله وشي ټول ګوښه شوي وو."
د دې اوسېدونکو په خبره، سهار وختي خلک بېرته خپلو کورونو ته ستانه شول.
خوست کې د طالبانو حکومت د ولایت مقام تاید کړې چې دا هوايي برید پاکستاني ډروڼ الوتکو کړی دی.
دغه ولایت لپاره د طالبانو حکومت ویاند مستغفر ګوربر په هغه بیان کې چې ازادي راډیو ته یې رالېږلی ویلي" بيګا ماخوستن شاوخوا لس نیمې بجې، د خوست ولایت سپیرې ولسوالۍ اړوند د ډيورنډ فرضي کرښې ته څېرمه سورکاخ سيمه کې، د پاکستاني درون الوتکو له لوري د حاجي نعیم ګل په نوم یو ځايي کس پر کور بمبار شوی، چې له امله یې د یادې کورنۍ درې تنه ماشومان شهیدان شوي او پنځه تنه نور د ښځو او ماشومانو په ګډون ټپيان شوي دي."
په بیان کې دا هم راغلي چې د یادې پيښې ټپیان روغتون ته لیږدول شوي دي او روغتیایي وضعیت یې د ډاډ وړ دی.
د بیان په ټکو، زیانمن کس یو عام سوداګر دی، او هېڅ ډلې سره تړاو نه لري.
د یادونې ده چې ځايي اوسېدونکو د برید ځای او قربانیانو ویدیوګانې او عکسونه هم ازادي راډیو سره شریک کړي، خو ازادي راډیو یې په خپلواک ډول د ځای، نېټې او وخت کره والی نه شي تایدولی.
په ورته وخت کې تېره شپه د افغانستان ختیځ ننګرهار ولایت په شینوارو ولسوالۍ هم د هوايي بریدونو راپورونه خپاره شوي، چې د ځايي خلکو او طالب چارواکو په خبره شپږ کسان په کې ټپیان شوي دي.
د یوه کراچیوان بیچاره کورنۍ ده، کله چې د شپې دا بمباري وشوه، ډېر وروسته تقریبا دوه ساعته کېدل چې خلک دلته راټول شولد ننګرهار د برید یو عیني ښاهد
د شینوارو ولسوالۍ د اته ویشتمې ویالې سیمې یو اوسېدونکي چې نه یې غوښتل راپور کې یې د موضوع د حساسیت له امله نوم خپور شي، د غږ بدلولو په شرط ازادي راډیو ته وویل"د شپې یوولس بجې وې چې پر یوې کورنۍ غالباً دا دوه ګزارونه وشول، دوی ملکیان دي، د یوه کراچیوان بیچاره کورنۍ ده، کله چې د شپې دا بمباري وشوه، ډېر وروسته تقریبا دوه ساعته کېدل چې خلک دلته راټول شول، چې دې خلکو سره مرسته وکړي او روغتون ته یې انتقال کړي، شاوخوا ته یې چې نور کورونه وو، ماشومان، ښځې سپین ږیري ګوښه شول چې بل ګوزار ونه شي."
ننګرهار ولایت کې د طالبانو د حکومت د اطلاعاتو او کلتور ريیس احسان الله ساجد هم ازادي راډیو ته وویل چې شینوارو ولسوالۍ کې د شهسوار په نوم د یوه عام کلیوال کور باندې تیره شپه د ده په خبره دوو بې پيلوټه الوتکو جلا - جلا بریدونه کړي دي" بیګاه پېښه شوې ده، د شهسوار په نوم یو غریب سړي کور لګېدلی، دوه ډرونه (بریدونه) یې پرې کړي، شهسوار دوه مېرمنې وې، هغوی هم برسېرنې ټپیانې دي او څلور کوچنیان ماشومان زامن یې هم سرسري ټپیان دي، هغوی یې صحت عامې ته راوړي د جلال اباد ښار،شهیدان نشته، کور یې ډېر ور ویجاړ کړی دی، خو دا معلومات موږ ته نشته چې دا بمبار چا کړی، طیارې په توره شپه راغلي معلومه نه ده ."
د طالبانو حکومت د بهرنیو چارو وزارت بیا د بریدونو په اعتراض کې کابل کې د پاکستان سفیر عبیدالرحمان نظاماني احضار کړی دی.
پاکستاني لوري ته په ډاګه شوه چې د افغانستان د حریم ساتنه د افغانستان اسلامي امارت ته سره کرښه ده او دغه ډول بېمسؤلیته کړنې به پایلې ولريد طالبانو بهرنیو چارو وزارت
دوی په یوه خبرپاڼه کې د پاکستاني پوځ لخوا د افغانستان هوايي حریم نقض او ډیورنډ کرښې ته څېرمه پر ولسي وګړو بمباري په کلکو ټکو غندلې او د افغانستان د ځمکنۍ بشپړتيا صريح نقض او پاروونکې عمل یې بللی دی.
بیان زیاتوي چې "پاکستاني لوري ته په ډاګه شوه چې د افغانستان د حریم ساتنه د افغانستان اسلامي امارت ته سره کرښه ده او دغه ډول بېمسؤلیته کړنې به پایلې ولري".
د یادونې ده چې پاکستان مخکې هم په وار وار د افغانستان د خاورې ځني برخو باندې هوايی بریدونه کړي او ادعا یې کړې چې د تحریک طالبان پاکستان (ټي ټي پي) پتنځایونه یې په نښه کړي.