د افغانستان د ځینو نورو سیمو په شان په خوست کې به هم د دوشنبې، سه شنبې، چهارشنې او پنجشنبې په ورځو د رضاء کارانو ټیمونه کلیو، جوماتونو او نورو هغو ټولنیزو ځایونو ته چې خلک په کې راټولیږي، ځي او هلته به شاوخوا درې لکه ۳۵ زره د پنځو کلونو څخه کم عمره ماشومانو ته د واکسینو، دوه، دوه څاڅکي ورکوي.
په خوست کې د پولیو یا ګوزڼ ناروغی ضد واکسینو د څلور ورځني کمپاین په پرانیست غونډه کې روغتیايي مسوولینو د ټولنې له مخورو او کورنیو وغوښتل، چې د واکسیناتورانو له ډلو سره مرسته وکړي.
په خوست کې روغتیايي مسوولین زیاتوي، چې د واکسینو د پلې کیدو د وضع شویو اصولو پر بنسټ هر هغه زون کې چې د پولیو مثبت واقعات ثبت شي، نو هلته د ګوزڼ ضد واکسینو ځینې اضافي کماينونه پلي کیږي.
د خوست د کتلوي معافیت مشر ډاکټر زاهدالله امیري وویل، د پکتیکا په برمل کې د مثبتو واقعاتو د ثبت وروسته دوی په دې زون کې اظافي کمپاینونه پلې کړل.
په کوم زون کې چې کیس مثبت شي د پولیو نو بیا درې کمپاینه پسې کېږي. دا مو دې میاشت کې دریم کمپاین دی. په دې خاطر دا واکسینونه تطبیقیږي چې تر ۵ کلونو کم عمره ماشومان له دې وایروس سره مبارزه وکړي او مقاومت یې زیات شي څو په پولیو وژونکې ناروغۍ اخته نه شي.د خوست یو روغتیايي مسوول
د روغتیا نړیوال سازمان په دې وروستیو کې خبرداری ورکړ چې په افغانستان کې د پولیو واکسین د کور په کور کمپاین نه پلي کول ماشومان، په ځانګړې توګه نوزیږي هغه، د پولیو واکسین څخه د محرومیت له خطر سره مخ کوي.
بلخوا دیني عالمان هم کورنۍ او مشران د واکسینو له رضاء کارانو سره مرستې ته رابولي او وايي، ماشومان پر خپلو والدینو دا حق لري، چې روغتیا ساتنې ته يې پام وکړي.
د خوست یو دیني عالم مولوي کفایت الله فهیمي وايي:
«ماشومان په خپله نه شي کولای چې د ځان حفاظت وکړي. دا په والدینو حق لري چې د دوی ساتنه وکړي. په ټولو خلکو، علما کرامو، مسوولینو او ځوانانو غږ کوو چې واکسین په سمه طریقه تطبیق کړي.»
افغانستان او پاکستان د نړۍ دوه هغه هېوادونه دي، چې تر اوسه هم په کې د ګوزڼ مثبتي پيښې موجودې دي.
روغتیاپالان وايي، ګوزڼ یوه انتاني یا (ساري) ناروغي ده چې د پولیو ویروس له لارې منځ ته راځي. دا ویروس عصبي سیستم باندې تاثیر کوي او کولای شي د یو کس د عضلاتو د فلج او حتی مرګ سبب شي.
سره له دې چې د ګوزڼ د ناروغۍ مخنیوی د واکسینو په کولو ممکن دی، خو که کوم ماشوم پرې اخته شي، بیا یې درملنه نه شي کېدلی.